Nobelisti Ferid Murati shpallet “Qytetar Nderi” i Tetovës

Nobelisti shqiptar prof.dr. Ferid Murati sot do të shpallet Qytetar Nderi i Tetovës. Nëpërmjet një ceremonie zyrtare, komuna e Tetovës ka organizuar një ngjarje madhështore për nder të nobelistit shqiptar, i cili po qëndron në Maqedoni dhe vendlindjen e tij në Gostivar.
“Duke vlerësuar se nobelisti shqiptar Ferid Murati është krenaria jonë dhe duke njohur kontributin e tij në sferën e mjekësisë, me propozim të kryetarit të komunës Prof.Dr.Sadi Bexheti, Këshilli Komunal i Tetovës njëzëri votoi Propozim-Vendimin për dhënie të titullit “Qytetar Nderi” i Tetovës profesorit të njohur shqiptar për kontributin e jashtëzakonshëm dhe tepër të çmuar në fushën e mjekësisë”, theksoi zëdhënësi i komunës së Tetovës, Flakran Pustina.
Sipas tij, manifestimi i së shtunës në Qendrën e kulturës në Tetovë, do të shoqërohet me program dokumentar për jetën dhe të arriturat e Prof.Dr. Ferid Muratit, ndërkaq me këtë rast kori dhe orkestra e qytetit të Tetovës do të performojnë me program të pasur artistik. (INA)/StrugaSot/