Vulat, kryesorja e raundit të gjashtë Kosovë-Serbi

Zgjidhja e çështjes së vulave doganore duket se e preokupojnë më së shumti Serbinë, tani pas embargos nga Kosova të mallrave serbe, që do t’i kushtojë qindra milionë eurp. Sot në Bruksel nis raundi i gjashtë i dialogut Kosovë – Serbi, që ndërmjetësohet nga Bashkimi Evropian, i ndërprerë në muajin korrik. Sipas delegacionit të Kosovës, në agjendë kësaj radhe do të jenë pesë çështje: njohja e vulave të doganave të Kosovës, telekomunikacioni, energjia, kadastrat dhe bashkëpunimin rajonal. Gjithashtu, në këtë raund të dialogut teknik do të analizohet dhe do të intensifikohet puna e grupeve për implementimin e tri marrëveshjeve të arritura më parë. Për katër çështjet e para, bisedimet janë në nivelin e diskutimit të draft marrëveshjeve, të prezantuara nga ndërmjetësi i BE-së, të cilat kanë për bazë draftet e 6 qershorit 2011 dhe komentet e palëve. Ndërsa çështja e bashkëpunimit rajonal shtrohet për herë të parë, përveç temës së CEFTA-s, e cila është diskutuar në raundin e parë.

Shefi i ekipit negociator serb, Stefanoviq, ka deklaruar se janë afër disa marrëveshje, ndërsa kryeministri i Kosovës ka thënë se “vulat doganore që do të përdoren me Serbinë, do të jenë të njëjta, si me të gjitha doganat me vendet e tjera”.

Kryetari i partisë më të madhe opozitare të Kosovës, LDK-së, Isa Mustafa është deklaruar kundër bisedimeve me njeriun që është palë e strukturave kriminale ne veri të Kosovës.

Një ditë para raundit të gjashtë të dialogut Kosovë-Serbi, zëdhënësja e Komisionit Evropian (KE), Maja Kocijançiç tha se Brukseli shpreson të arrihet përparim në bisedime. Komisioni Evropian do të dëshironte të shihte normalizimin e marrëdhënieve ndërmjet Kosovës e Serbisë. Ajo tha se bashkëpunimi rajonal paraqet kusht të domosdoshëm për të gjitha vendet e Ballkanit perëndimor në procesin e përafrimit të tyre me Bashkimin Evropian. "Ky është një qëndrim yni shumë i njohur. Momentalisht jemi të fokusuar në dialogun. Nesër fillon rundi i ri i bisedimeve ndërmjet Beogradit e Prishtinës, të cilat në emër të BE së i kryeson Robert Kuper", tha Kocijançiç. Sipas saj, të gjitha çështjet për të cilat është dialoguar deri tash, do të jenë edhe të premten në rendin e ditës, përfshirë këtu edhe vulat doganore.