Lamtumirë kryekomisar Tahiraj! Prehet në Varrezat e Dëshmorëve

TIRANË- ‘Lamtumirë
kryekomisar! Vepra jote nuk do të vdesë kurrë’, ishin fjalë që kolegë
dhe miq thanë mbi arkivolin ku shtrihej trupi i shefit të komisarit të
Shijakut, Adem Tahiraj, 49-vjeç. Nën muzikën funebre në sallën e e
Shtëpisë Qëndore të Ushtrisë u shfaqën personalitete të rëndësishme të
vendit që shtrënguan duart dhe ngushëlluan familjarët e kryekomisarit.

Në
ceremoninë e homazheve u vu re prania e kryeministrit Berisha,
kryeparlamentares Jozafina Topalli si dhe kreut të opozitës Edi Rama që
shoqërohej nga një grup deputetësh socialistë.

Homazhet
përfunduan rreth orës 16:00, për të vazhduar me ceremoninë e varrimit
pranë Varrezave të Dëshmorëve të Kombit, një ceremoni e ngushtë kjo, ku
morën pjesë të afërm, miq e kolegë. Në ceremoni edhe ministri i
Brendshëm Flamur Noka.

Njëri prej kolegëve të tij tha fjalët e lamtumirës të shoqëruara më pas me 2 minuta heshtje.

“Kjo,
dita e lamtumirës për mikun tonë, janë momentet e një dhimbje të thellë
pasi një ditë më parë dora e krimit këputi në mes jetën e komisar
Ademit. Me humbjen e tij, policia humbi një punonjës të aftë me vlera të
larta, kolegët një mik të mirë. Gjatë karrierës së tij 26 vjecare ai
nuk u tremb asnjherë madje dha dhe jetën në përballje me krimin”, tha
njëri nga kolegët policië në fjalën e lamtumirës, ndërsa më pas u
mbajtën edhe 2 minuta heshtje në nderim të figurës së tij.

“Kujtimi yt do jetë gjithmonë i pranishëm në zemrat tona”, u theksua në ceremoni.

Pas
dhënies se lamtumirës, koleget do vijojnë me vizita tek familjarët e
punonjësit të policisë të rënë në krye të detyrës kryekomisar Adem
Tahiraj

BERISHA HETIM KRIMIT MAKABËR, TË VIHET DREJTËSIA NË VEND
Kryeministri
Sali Berisha vizitoi mesditën e sotme, familjen e kryekomisarit të
vrarë dje Adem Tahiraj. Shefi i qeverisë duke dënuar aktin kriminal i
shprehu ngushëllimet e tij familjes Tahiraj, teksa theksoi se në
dhimbjen e tyre bashkohet e gjithë Shqipëria.

“U shpreh
ngushëllime familjarëve. Këtë dhimbje e ndani me të gjithë shqiptarët.
Dhimbje e madhe për efektivët e policisë, shtetin. Humbja shumë e rëndë
për familjen dhe për të gjithë “,- tha Berisha.

Kryeministri
duke nënvizuar se humbja e Tahirajt nuk kompensohet me asgjë theksoi se
shteti do bëjë gjithcka për të vënë drejtësinë në vend.
“Do bëhet
gjithçka që drejtësia dhe ligji të thonë fjalën e tyre. Të hetohet çdo
aspekt dhe detaj i këtij krimi makabër”,- theksoi Berisha.

RAMA: T’I JAPIM LAMTUMIRËN E FUNDIT SHËRBËTORIT TË VRARË TË SHTETIT
Kryetari
i PS-së, Edi Rama, dhe deputetët socialistë të Komisionit të Sigurisë
ishin të pranishëm në homazhet e zhvilluara për nder të kryekomisarit
Adem Tahiraj, i vrarë një ditë më parë në krye të detyrës.

“Do
t’i japim lamtumirën e fundit shërbëtorit të vrarë të shtetit. Të mbetet
ndjesia e hidhur e policisë se tradhtuar. Yryshi që ka marrë krimi në
Shqipëri, pjellë e këtij politizimi”- shkruan në rrjetin social
“Twitter” kreu i PS-së.
Sipas Ramës, rivendosja e rendit e sigurisë
është bërë domosdoshmëri dhe “ky do të jetë prioriteti i PS-së me
largimin e këtij pushteti”.

NGJARJA
Ngjarja
shumë e rëndë ndodhi pasditen e djeshme në Katund Sukth të rrethit të
Durrësit. Shefi i Komisariatit të Shijakut është vrarë me armë zjarri
teksa kryente detyrat e tij. Shefi i Komisariatit të Policisë së
Shijakut Adem Tahiraj sapo kishte dalë nga një mbledhje në Drejtorinë e
Policisë së Qarkut të Durrësit ku më pas kishte zbritur menjëherë në
bazë për të zbatuar detyrat e shtruara në mbledhje. Bëhej fjalë për një
plan masash që synonte arrestimin e personave që qarkullojnë me armë pa
leje.

Gjatë tentativës për të kontrolluar një automjet ku
gjendeshin disa të rinj, komisari është qëlluar për vdekje me breshëri
automatiku në automjetin e tij. Më pas, autorët janë larguar nga vendi i
ngjarjes me automjetin e tyre. Sipas burimeve bëhet e ditur se në
momentin e ngjarjes sëbashku me komisarin gjendeshin shoferi i tij si
dhe një efektiv policie me shërbim në atë zonë. Burime pranë policisë
thanë se para ngjarjes, Tahiraj ka patur një debat me Ledio Krasniqin,
një 18-vjeçar, nip të fisit Xhakaj në Sukth.

Pasi ka nisur
kontrolli me të rinjtë e makinës së ndaluar ku gjendej Ledio Krasniqi,
ka mbërritur një makinë e dytë nga e cila është qëlluar me breshëri
zjarri. Ilir Xhakja ka qëlluar në drejtim të makinës së policisë ku për
pasojë ka mbetur i vdekur në vend shefi i komisariatit të policisë së
Shijakut Adem Tahiraj në një kohë që vartësit e tij fatmirësisht nuk
kanë pësuar asnjë dëmtim nga plumbat. Më pas makina me të rinjtë është
larguar nga vendi i ngjarjes.
Dy efektivët kanë njoftuar Drejtorinë e
Policisë së Durrësit për atë që kishte ngjarë në Katund Sukth. Po ashtu
u mësua se plumbat kishin qëlluar edhe një grua të moshuar, 67-vjeçaren
Lene Ndoja që po kalonte pranë vendit të ngjarjes.

(d.b/e.m/m.a/BalkanWeb)