Çoçka: Do hakmerrem me fëmijët e vrasësit të gruas, më preu në besë

nga **WebMaster** Thu 4 Oct 2012 - 0:16

Nga: ENKELEJDA SKENDERASI

KORCE-
Gruaja ime më turpëroi. Nuk doja ta varrosja, nuk i la vend vetes të
hynte e vdekur në këtë derë dhe të nderohej siç i ka hije një të
vdekuri. Nuk më intereson se kush do e varrosë, trupin e saj, e lashë në
morg. Unë do ju pres kokën si cjap dy fëmijëve të Rozanit dhe do i var
në derën e shtëpisë. Vërtet ajo bridhte me atë, por ai më preu në besë,
pasi hynte dhe dilte në shtëpinë time”. Kështu deklaroi dje, Ylli
Çoçka.

Bashkëshorti i 35- vjeçares pohoi se jetonin në varfëri
të skajshme dhe se kishin konflikte prej kohësh me njëri-tjetrin. Sipas
tij, refuzimi i varrimit të nënës së fëmijës së tij, ishte më e pakta që
mund të bënte pas nëpërkëmbjes së nderit. Burime zyrtare nga Drejtoria e
Policisë së Korçës pohojnë se trupi i pajetë i Eliverta Çoçkës u tërhoq
nga prindërit e saj. Ajo u varros dje nga të afërmit e saj, rreth orës
16:00, në fshatin e lindjes, Starovë të Pogradecit.

HETIMI
Një
ditë pas krimit të trefishtë të ndodhur në fshatin Podgorie të rrethit
të Korçës, hetuesit e çështjes pohuan se në vendin e ngjarjes janë
gjetur 30 gëzhoja. Ekspertët sqarojnë se 52-vjeçari Viktor Rozani (baba i
dy fëmijëve), nga fshati Podgorie, ka vrarë fillimisht taksistin
39-vjeçar, Feridon Bollgurin dhe më pas të dashurën e tij, Elivertën.
Mësohet se kjo e fundit është qëlluar për vdekje teksa po hapte derën e
makinës me targa KO 514 A. Burimet pranë grupit hetimor shprehen se
brenda automjetit është gjetur një tufë flokësh që i përkisnin gruas së
vrarë. Gjithashtu, në automjet, në sediljen e parë të pasagjerit janë
gjetur edhe disa shishe birrë që 35-vjeçarja (nënë e një djali 7 vjeç)
dhe taksisti Feridon Bullguri ishin duke konsumuar para vrasjes.

RREFIMI
Lajmin
për vrasjen e gruas, Ylli Çoçka e ka mësuar nga bashkëfshatarët e tij.
Ai është tronditur kur ka mësuar se e shoqja e tradhtonte prej kohësh.
Çoçkën e gjetëm dje në banesën e tij të ndërtuar me plitharë (baltë), në
periferi të fshatit Podgorie. Kryefamiljari nuk ka hapur mort në
shtëpinë e tij të rrënuar. I strukur në një divan (në shtëpi s'ka
televizor dhe orenditë janë të vjetruara), ai pinte pareshtur duhan.

Në
një intervistë për "Gazeta Shqiptare", Çoçka tregoi se përse e la në
morg trupin e bashkëshortes së tij dhe se çfarë marrëdhëniesh kishte me
të.
Si e morët vesh lajmin për vrasjen e bashkëshortes suaj?
Lajmin
e "turpshëm" e mësova nga bashkëfshatarët e mi. Kisha dalë si zakonisht
në punë dhe u ktheva në orët e vona të natës. Kur u ktheva nuk më tha
njeri gjë, ndërsa Eli (kështu e thërrisnim ne) nuk ndodhej në shtëpi.
Kjo nuk ishte hera e parë që ajo largohej dhe nuk u shqetësova. Mendova
se do të kthehej më vonë, pasi justifikohej se ishte tek shoqet. Kur u
ngrita në mëngjes, mësova lajmin e kobshëm dhe të turpshëm njëkohësisht.
Kështu ndodhi, ajo mori atë që kërkoi vetë.
Pse nuk e tërhoqët kufomën e Elivertës nga morgu?
Ajo
nuk mund të varroset në këtë shtëpi. Ajo varrosi vetveten me këtë
paturpësi që bëri, ndaj dhe e lashë në morg. Nuk më intereson fare se
kush do e varrosë apo do e lënë aty, nuk dua të dëgjoj asgjë në lidhje
me të. Përderisa bëri një turp të tillë, ajo nuk meritonte të nderohej
qoftë edhe e vdekur. Pastaj, si mund ta fusja unë në shtëpi njëherë
atë?! Nuk do shumë mend që vetëm kështu do të veproja. Duke e braktisur
të vdekur, ishte më e pakta që unë mund t'i bëja, pas asaj që ajo më
bëri mua.
Kishit konflikte me bashkëshorten tuaj?
Konfliktet
ishin të shpeshta. Ne kishim gati dhjetë vite martesë dhe kishim shumë
mosmarrëveshje me njëri-tjetrin. Ajo ikte kur i donte qejfi dhe vinte
sërish kur i donte qejfi. Nuk e kuptoja se çfarë ndodhte me të, por tani
i kam të qarta të gjitha. Unë punoja në bujqësi, ndërsa ajo rrinte në
shtëpi, kujdesej gjoja për djalin, dhe ja se çfarë bënte nga krahu
tjetër. Martesa jonë vetëm e tillë nuk ishte, por për hir të fëmijës
qëndronim bashkë. Grindjet vinin nga varfëria, e shikoni vetë se ku
jetonim, në të shumtën e rasteve flinim me barkun bosh.
Kishit dijeni për lidhjet jashtëmartesore të gruas tuaj?
Absolutisht
jo. Nëse do të dija diçka, nuk do e mbaja në krevat. Të vërtetën e
mësova tani. Ajo më turpëroi mua dhe fëmijën. Kjo është e pafalshme,
edhe për autorin, me të cilin kishim dhe hyrje-dalje familjare. Ma
paskan punuar pas krahëve.
(m.a/Gazeta Shqiptare/BalkanWeb)