Rrahje dhe të shtëna armësh në Mitrovicë

Një përleshje mes katër personave dhe me të shtëna armësh ka ndodhur të premten rreth orës 15:00 në një dyqan të kompjuterëve, afër ish muzeut në qendër të Mitrovicës.
Burime të Kosovapressit kanë bërë të ditur se dy persona, pasi kishin hyrë në dyqan për të vjedhur, kanë hasur në rezistencë të pronarit të dyqanit. Gjatë rrahjes mes vete, ka ndërhyrë një polic në rroba civile që kishte qenë kalimtar i rastit për të parandaluar rrahjen.

“Përleshja ka zgjatur pak minuta dhe ka pasur edhe të shtëna me armë zjarri. Përveç lëndimeve nuk ka pasur të plagosur”, kanë thënë burimet.

Zëdhënësi i policisë në Mitrovicë, Avni Zahiti, ka konfirmuar ngjarjen, duke mos qenë në gjendje të precizojë se kush ka shtënë me armë. Sipas tij, hetimet janë në fazën preliminare dhe policia deri tani ka sekuestruar një thikë dhe një shufër hekuri, ndërsa po i mban nën kontroll personat të cilët ndodhen në spital.

Në anën tjetër, drejtori i QKMF-së në Mitrovicë, Fevzi Sylejmani, ka thënë për Kosovapress se katër persona me lëndime të lehta janë lajmëruar në emergjencën e këtij institucioni, dhe pas ofrimit të ndihmës së parë, ata janë dërguar në spitalin e qytetit. Sipas tij, jeta e tyre nuk është në rrezik dhe bëhet fjalë për lëndime të lehta, si ndrydhje të këmbës dhe gërvishtje.