Molla ul nivelet e kolesterolit

Mjafton të konsumosh vetëm një mollë në ditë për katër javë radhazi për të reduktuar me 40 për qind nivelin e kolesterolit të keq në gjak (LDL).

Efekti i mollës në uljen e kolesterolit të keq u vishet pikërisht polifenoleve, një grupi antioksiduesish me të cilët është e pasur veçanërisht lëkura e kësaj frute. Këta antioksidues janë shumë të rëndësishëm për një shëndet të mirë dhe prania e tyre në gjak luan një rol kyç në sistemin imunitar, i cili forcohet në luftën kundër sëmundjeve dhe dëmtuesve të huaj.

Sipas një studimi të shkencëtarëve amerikanë, efektet pozitive të një molle të freskët janë edhe më të mëdha krahasuar me ato nga marrja e tabletave vitaminoze përmes suplementëve.

Studiuesit i kanë ndarë personat e përfshirë në studim në tre grupe. Grupi i parë konsumoi një mollë në ditë, i dyti një tabletë me polifenole, i treti ilaçe për reduktimin e kolesterolit. Pas katër javësh shkencëtarët vunë re se grupi i parë (konsumatorë të mollëve) kishin një reduktim me rreth 40 për qind të kolesterolit të keq.

Molla është shumë e pasur edhe me vitamina, acide organike dhe lëndë të tjera të nevojshme për trupin e njeriut. Kjo përmbajtje e bën mollën mjaft të vlefshme edhe për kurimin e një sërë sëmundjesh.