Arrestohen tre persona për grabitje të armatosura

Arrestohen tre persona për grabitje të armatosura

Policia ka arrestuar tre persona, H.R. 1982, A.H. 1987, dhe A.R. 1993, të gjithë nga Mitrovica, për dyshim të përfshirjes së tyre në bashkëkryerje të veprave të rënda të grabitjes dhe mbajtje në pronësi, kontroll, posedim apo shfrytëzim të paautorizuar të armëve, duke vepruar në grup të armatosur dhe të maskuar.
Zëdhënësi i policisë në Mitrovicë, Besim Hoti, ka thënë se gjatë fundjavës, hetuesit rajonal të Policisë së Kosovës, kanë realizuar bastisje të koordinuar të dy shtëpive në dy lokacione të ndryshme dhe arrestim të të dyshuarve.

“Operacioni i bastisjes ka rezultuar me identifikimin dhe arrestimin e tre personave si të dyshuar kryesor për përfshirjen e tyre në së paku tri raste të grabitjes së armatosur, që kanë ndodhur në Mitrovicë, përkatësisht në lokale të lojërave të fatit (kazino)”, ka thënë kapiteni Hoti.

Ai ka shtuar se ndaj tre të dyshuarve të arrestuar është ngritur kallëzim penal dhe të njëjtëve u është shqiptuar masa e paraburgimit deri në 30 ditë.