Koleksion me çudira!

First topic message reminder :

Ngoc: Tri dekada pa gjumë

64-vjeçari Thai Ngoc vuan nga pagjumësia që nga mbrëmja e vitit 1973, kur kaloi ethe të forta. Ai ka numëruar një numër të pakufizuar delesh gjatë 11.700 netëve të njëpasnjëshme. "Nuk e di nëse pagjumësia ka ndikuar në shëndetin tim apo jo. Doktori thotë se jam për bukuri, me përjashtim të mëlçisë dhe punoj normalisht si të tjerët", thotë Ngoc. Ai mban në kurriz çdo ditë 50 kilogramë çanta me plehra, duke i transportuar për katër kilometra. Gruaja e tij thotë se gjatë ditës kujdeset për derrat dhe pulat, ndërsa natën punon si roje. Gjatë netëve të të tre muajve ka hapur liqene artificiale për të rritur peshq.

Balona qetësues nga sapuni
Këshilli i qytetit të Boltonit në Britani të Madhe ka vendosur që të rinjtë e dehur dhe të shfrenuar t’i zbavit me shpërndarjen e "pajisjes" për të fryrë balona nga sapuni dhe kështu të ulë sjelljen e dhunshme nëpër rrugët e qytetit!.

Lodrat e kaltra dhe portokalli do t’i shpërndajnë policët vullnetarë çdo të shtunë të muajit dhjetor.

Në këtë aksion, të cilin e ka propozuar organizata “Be Safe Partnership”, e të cilën e ka pranuar Këshilli i qytetit të Boltonit, zjarrfikësit dhe policia, shumë e konsiderojnë vetëm gjuajtje të parave të tatimpaguesve.

'Shpesh na bëjnë dëm në dyqan të dehurit agresivë dhe nuk mendoj se fryrja e balonave do të ndikoj që ata të qetësohen. Ka shumë gjasa që ata do të fryjnë balonat në drejtim të kalimtarëve të rastit”, thotë Elizabeth Edwards, pronare e një dyqani.

''Nuk dua të paguaj tatim nëse ata do ta shpenzojnë në këtë mënyrë”, ka shtuar ajo.

Gruaja gjen 14 gjarpinj në dhomën e saj të fjetjes
Një grua australiane ka menduar se ishte duke parë një ëndërr të keqe kur i gjeti 14 gjarpinj në dhomën e saj të fjetjes.

Esther Honegger,nga qyteti Fannie Bay në Northern Territories, ka thënë se ishte “tmerruar” kur pa 14 gjarpinjtë në tepih.

"Thashë me vete 'Oh Zot, a thua sa janë?',"ka thënë ajo për gazetën lokale Northern Territorian. "Unë i urrej gjarpinjtë dhe kudo që sillesha, para apo prapa, shihja një tjetër".

"Ata ishin gjithandej, një ishte mbledhur rreth jastëkut tim, një rreth karriges, dhe kur dola jashtë një ishte në korridor, tjetri në parmak dhe një tjetër shkallë”, ka shtuar Honegger.

"Ishte si një ankth. Kudo që ktheja kokën ata shfaqeshin", ka shtuar ajo.
Instruktorja e vozitjes thirri miqtë e saj, të cilët ajo thotë se nuk i besuan, e më pas thirri policinë të cilët i thanë të thërrasë lidhjen telefonike e cila punon 24 orë në ditë me gjarpinjtë.

Kapësi i gjarpinjve Geoff Brouff erdhi në shtëpinë e saj dhe arriti të kap shtatë nga gjarpinjtë më të ri.

Por mëngjesin e nesërm ai pranoi edhe një thirrje të xhindosur nga zonja Honegger e cila kishte gjetur edhe tjerë. Të nesërmen ajo gjeti edhe dy gjarpinj.
Tani ajo është duke shpresuar se të gjithë gjarpinjtë janë kapur.

Gruaja akuzohet për vjedhjen e dekorimeve të fqinjit
Një grua amerikane është duke u përballur me akuzat për vjedhje pasi që supozohet se i ka "vjelë" dekorimet e Krishtlindjeve nga oborri i fqinjit.

Zyra e sherifit të qarkut të Manchesterit në SHBA ka thënë se një grua 51-vjeçare është gjetur në shtëpinë e saj të hënën në mëngjes me dekorimet e së paku tri shtëpive rreth e qark.

Autoritetet kanë thënë se hulumtimi ka filluar rreth orës 4 e 30 të mëngjesit të hënës, pasi që një grua raportoi një zhurmë të madhe dhe zbuloi se Babadimri e dordoleci nuk ishin më në oborrin e saj.

Pasi që policët shkuan në shtëpinë e saj, një fqinje tjetër e cila po shëtiste qenin raportoi se ajo, gjithashtu, kishte qenë viktimë e vjedhjes.

Arrestohet për ndezje të grillit në banesë
Policia ka arrestuar një mashkull 44-vjeçar amerikan i cili kishte ndezur një grill të vogël brenda banesës së tij, duke i rrezikuar kështu fqinjët. Policia e ka paditur atë me rrezikimit të shkallës së dytë pasi që dy persona u sëmurën.

Policia e qytetit Ledyard në Connecticut të SHBA-ve thonë se grilli krijoi nivele të rrezikshme të monoksidit të karbonit në ndërtesë. Dy banorë ishin dërguar në spital për tu trajtuar.

Mashkulli është liruar pasi që ka paguar 500 dollarë amerikanë.

Rëntgeni zbulon hajnin
Tinejxheri amerikan ka tentuar të fshijë keqbërjën e tij duke i gëlltitur vathët të cilët i kishte vjedhur, mirëpo kjo nuk i ka bërë punë. Është arrestuar nën dyshimin për vjedhje dhe i është nënshtruar kontrollit me rëntgen.

Policia amerikane ka arritur falë rrezeve rëntgen të gjej vathët që ky i ri i kishte vjedhur nga qendra tregtare “JCPenney” në Naples të Floridas.

Autoritetet kanë njoftuar se William Colburn do të paditet për vjedhje dhe fshehje të dëshmive. Zëdhënësi i policisë së Naples ka thënë se roja i qendrës tregtare e ka parë 18-vjeçarin Colburn se si nga vitrina po vidhte vathët dhe po i vendoste në bocën e ujit.

Kur Colburn e hetoi se roja po i afrohej, ai piu ujin, e bashkë me të edhe vathët.
Policia ka njoftuar se kontrolli me rëntgen ka dëshmuar se vathët gjenden në lukthin e të dyshuarit. Zëdhënësi nuk ka mundur të thotë nëse hajnit të ri do t’i duhet ndihma mjekësore.

Holandezi rekorder në dhurimin e spermës
Si duket kur kohën tuaj të lirë t’ia dedikoni shëtitjes nëpër Evropë me qëllim të dhurimit të spermës, ndoshta këtë do të na mund të na e përshkruaj holandezi nga qyteti Maastricht. Ai është shpallur rekorder botërorë për “zbrazje” humanitare dhe tani numëron dyzetë e gjashtë fëmijë.

Holandezi Ed Houben jozyrtarisht është shpallur si dhuruesi më aktiv i spermës në botë. Me spermën e tij kanë mbetur shtatzënë 46 gra me të cilat mbanë kontakt të rregullt, e në shumë raste marrëdhënia është bërë miqësi e vërtetë.

Se sa larg shkon mirëkuptimi i Edit për vështirësitë me sterilitet, flet edhe fakti se pasi që ka përmbushur kuotën në klinikën për fekondim artificial prej 25 dhurimeve ka bërë aq reputacion sa që njerëzit kanë filluar ta kontaktojnë privatisht për tu ndihmuar me spermën e tij për të realizuar trashëgiminë e tyre.

“Këtë e bëj sepse e di sa e dëshpëruar mund të jetë dëshira për fëmijë. Pos kësaj, zvarritja nëpër klinika për fekondim mund të merr jashtëzakonisht shumë kohë dhe shumë para”, sqaron Ed pse ka vendosur që të kontribuoj në dhurim.

Sot Ed udhëton nëpër Evropë dhe rri nëpër hotele ku takon gra dhe çifte. Pas njohjes çifti merr epruvetën me spermën e tij dhe i lë që të kryen gjënë delikate vetëm. Nganjëherë, natyrisht, çiftet e vizitojnë edhe në shtëpinë e tij.

Gruaja thërret policinë pasi që burri, 82-vjeçar, merr Viagra
Një burrë 82-vjeçar italian i cili ka marrë një pilulë Viagra ka frikësuar aq shumë gruan e tij sa që ajo thirri policinë.

Giovanni di Stefano, nga qyteti i Palermos, ishte eksituar aq shumë sa që gruaja e tij mendoi se do të pësonte sulm në zemër prandaj thirri numrin 999 – që është numri i policisë në Itali.

"Policët nuk bënë asgjë, por prania e tyre kishte efektin e dëshiruar. Ai humbi interesim e tij për të bërë dashuri bukur shpejt", ka thënë një mik i familjes.

Gruaja e tmerruar 69-vjeçare, Carla, i ka thënë policisë: "Ai është 82 vjeçar prandaj mendova se një dashuri aq e madhe do të mund të kishte pasoja vdekjeprurëse".

Të burgosurit kanë të drejtë për tu zbukuruar
Të burgosurit në Gjermani kanë të drejtë të përdorin losion pas rrojës dhe krem për fytyrë, ka vendosur instanca më e lartë e gjykatës gjermane, duke vlerësuar se kozmetika në burg nuk duhet të jetë e rezervuar vetëm për gratë.

Gjykata kushtetuese ka vendosur në favor të një burgosuri i cili pohon se është viktimë e diskriminimit gjinor pasi që nuk i lejohet të blejë rregullisht produkte të bukurisë, derisa këtë të drejtë e kanë të burgosurat në të njëjtin burg. Sipas vendimit të gjykatës, me një rregullore të tillë të burgut shkelet barazia në mes të gjinive.

Edhe pse një numër i vogël i meshkujve në burgje shfaqë nevojën për kozmetike, "ato produkte në thelb nuk janë të dedikuara vetëm për gratë", kanë vlerësuar gjykatësit. Ata kanë shtuar se kushtetuta gjermane, “mbron edhe të drejtën në dallime, pa diskriminime".

Mu për këtë, Gjykata kushtetuese e ka kthyer rastin për shqyrtim tek gjykatësi rajonal i cili ka vendosur kundër të burgosurit i cili përkujdeset për lëkurën e tij.

Djaloshi, nëntëvjeçar, shkruan librin se si të flitet me vajza
Një djalosh nëntëvjeçar në Shtetet e Bashkuara të Amerikës ka publikuar librin e quajtur “Si të flisni me vajzat”.

Libri i Alec Grevenit filloi si një projekt i shkrimit kreativ në shkollën e tij në Castle Rock të Colorados.

Pamfleti i tij i shkruar me dorë është shitur nga 5 dollarë në panairin e librit të shkollës ku u bë edhe më i shituri.

Gazetat lokale shkruan për këtë ngjarje, me pas ai u ftua në një emision televiziv që edhe e solli atë në sipërfaqe për të nënshkruar kontratë me shtëpinë botuese HarperCollins.

Tani libri i tij mund të gjendet në 46 faqe në mbarë Shtetet e Bashkuara të Amerikës.

"Kam parë se shumë djem kishin telashe të flasin me vajzat" ka thënë Alec për gazetën e njohur amerikane “New York Post”. "Nëse unë them tung dhe ti ma kthen me tung, sigurisht kemi një fillim të mbarë", ka thënë ai.

Këshillat e tij për djemtë përfshinë thonë – mos u fryni më, mos e teproni me komplimente dhe kini kujdes nga “vajzat e bukura".

"Është lehtë të vërehen vajzat e bukura sepse ato kanë vathë të mëdhenj, fustane të shtrenjta dhe shumë stoli", shkruan ai në kapitullin e tretë. "Vajzat e bukura janë si automjetet që kanë nevojë për shumë vaj".

Ai vazhdon se: "Zgjidhja më e mirë për djemtë është një vajzë e rregullt. Mbani mend, disa vajza të bukura janë të pandjenja kur vjen puna tek djemtë. Mos u lejoni të ju kapin".

Gjen 10.000 funte të bëra copë e grimë në mbeturina
Pastruesi britanik i ka gjetur në mbeturina 10.000 funte (11.534 euro) dhe ato i ka lajmëruar në polici. I kanë thënë që mundet t’i mbajë. Për arsyen e thjeshtë, monedhat ishin të bëra copë e grima.

Graham Hill ka pasur fatkeqësi të pabesueshme në fat. Ka gjetur shumë para në kontejnerin e mbeturinave në rrugën kryesore Lincoln Central në Lincolnshire, por ato ishin copa-copa. Më saktë, bëhet fjalë për 10.000 funte në kartëmonedha prej dhjetë e njëzet.



Pastruesi i ndershëm i ka dërguar në polici, mirëpo atje i kanë thënë se askush nuk e ka paraqitur humbjen e parave, dhe se mund t’i mbajë për vete pasi që t’i ketë nën posedim për gjashtë muaj, periudhë kjo e cila sapo ka kaluar.

Për më shumë, nëse Hill arrin t’i bëj bashkë, kartëmonedhë për kartëmonedhë, paratë e tilla do të mund t’i përdorte normalisht, apo edhe t’i ndërrojë me të reja.

Akuzohet për urinim në policin që e arrestoi
Një mashkull 35-vjeçar është duke u përballë me akuza pasi që supozohet se ka vozitur në gjendje të dehur dhe më pas ka urinuar në pjesën e prapme të automjetit të policisë dhe në policin i cili e ka arrestuar.

Një ankesë kriminale thotë se mashkulli është ndaluar të mërkurën në mëngjes pasi që një polic e pa atë duke vozitur në formë të çrregullt dhe duke goditur një shtyllë në një pompë të benzinës.

Ankesa ka thënë se mashkulli ka dështuar të kalojë testet për vetëpërmbajtje dhe kur është marrë në stacionin policor, ka urinuar në pjesën e prapme të automjetit patrullues dhe ka spërkatur policin dhe duke e goditur atë në kokë.

Mashkulli është duke u përballë me akuza për krim dhe dy kundërvajtje. Ai përballet me 15 vite burgim nëse shpallet fajtor.

“Mashkulli shtatzënë” sërish shtatzënë!
Thomas Beatie, mashkulli trans-gjinor i cili edhe përkundër ndryshimit të gjinisë ka mbajtur organet riprodhuese, pas lindjes së parë të suksesshme, me gruan e tij Nancy është duke pritur të lind fëmijën e dytë.

Shtatzënia e parë e Thomas Beatiet me muaj të tërë ka mbushur faqet e gazetave dhe ka zgjuar kureshtjen e publikut. Ky mashkull i cili dikur ka qenë femër ka mbajtur mitrën dhe vezoret, e pasi që gruaja e tij nuk ka mundur të mbetet shtatzënë, atëherë ky e ka bërë atë.

Pas lindjes së mundimshme dhe 40 orëve të dhimbjeve, Thomas në muajin gusht ka lindur vajzën e shëndetshme dhe tani sërish është shtatzënë.

Intervistën e madhe me të e ka bërë gazetarja Barbara Walters për rrjetin televiziv ABC, gjatë së cilës Thomas e ka bërë publik lajmin e gëzueshëm.

''E kam shikuar mirë dhe e kam pyetur: 'A jeni sërish shtatzënë?''', ka përfolur Walters pjesët e intervistës së saj e cila do të shfaqet në kuadër të emisionit special What Is a Man, What Is a Woman? me emrin Udhëtimi i Mashkullit Shtatzënë.

''Fëmija do të lind në muajin qershor”, ka zbuluar Thomas.

Rekordere në të puthur
Ruth Reynolds zyrtarisht është bërë femra që puth më së shpejti në botë. Ajo për gjithsej gjysmë minute ka arritur të puth hiq më pak se 42 meshkuj, të cilët me durim kanë qëndruar në radhë.

Kjo 24-vjeçare ka mbledhur dhjetëra vullnetarë të cilët kanë qenë të gatshëm të pranojnë puthje në gojë.

Ajo pa ndonjë problem e ka thyer rekordin e mëhershëm të udhëheqëses televizive gjermane, e cila brenda një minute ka puthur vetëm 36 meshkuj.

Gjatë thyerjes së këtij rekordi, të mbajtur në një qendër tregtare të Londrës, kanë marrë pjesë edhe zyrtarët e Librit të Rekordeve Guinness.

''Ka qenë kënaqësi. Kam puthur më shumë meshkuj brenda gjysmë minute sesa gjatë tërë jetës sime'', ka zbuluar Ruth.

Fatbardhi mbijeton pasi që shkelet nga treni
Kësaj i thonë nafakë, një burrë nga Alabama Veriore e SHBA-ve ka mbetur gjallë pasi që është shkelur nga treni të enjten pasdite.

Zyrtarët e shërbimit të zjarrfikësve dhe shpëtimit në Huntsville të Alabamas kanë thënë se një vozitës i trenit ka vërejtur 61-vjeçarin Arnold Romine të shtrirë në udhëkryqin e binarëve me rrugën kryesore të trafikut. Dëshmitarët kanë thënë se vozitësi i ka rënë burisë dhe ka tentuar të ndalojë trenin.

Zjarrfikësit kanë thënë se deri në kohën kur treni me qymyr është ndalur, tetë vagonë veçmë kishin kaluar mbi trupin e Rominet.

Çuditërisht, ai kishte pësuar vetëm disa lëndime të vogla. Më vonë ai është trajtuar dhe liruar nga spitali i qytetit Huntsville.

Është e paqartë pse Romine ishte duke qëndruar i shtrirë në binarë.

Djali godit të ëmën me sharrë, i ofron asaj 5 dollarë
Autoritetet policore në Fort Pierce të SHBA-ve kanë thënë se një djalosh 11-vjeçar ka goditur nënën e tij me një sharrë në kokë dhe më pas i ka ofruar asaj 5 dollarë që mos ta thërrasë policinë.

Zyra e Sherifit lokal ka raportuar se djaloshi dhe nëna e tij ishin zënë me njëri-tjetrin të mërkurën kur ajo po mundohej ta shtynte për të pirë ilaçet e tij.

Djaloshi iku tek një shtëpi e afërm, ku filloi të godas një pemë me sharrë. Kur e ëma në fund u kap me djalin e saj, autoritetet thonë se ai e goditi atë me sharrë në kokë, duke i shkaktuar asaj një gërvishtje të vogël.

Raporti i Sherifit policor thotë se pikërisht atëherë djaloshi ka filluar të lus të ëmën e tij të mos e thërrasë policinë dhe i ofroj asaj një bankënotë prej 5 dollarësh.

Gjyshes në varrim i vijnë 172 nipër
Gjyshja Margaret Ward, e cila ka vdekur kohë më parë në moshën 87-vjeçare, ka pasur jetë me të vërtetë të pasur. Në fakt, në varrimin e saj kanë ardhur madje 172 nipër të cilët me këtë rast janë bashkuar për herë të parë në një vend.

Irlandezja Margaret me bashkëshortin e saj Charles ka pasur 15 fëmijë, 172 nipër, 36 stërnipër dhe 18 stër-stërnipër.

Në varrimin e saj ishin të pranishëm 12 fëmijët e saj të gjallë Joan, Patrick, Martin, Margaret, Mary, Catherine, Charlie, Bernard, Bridget, Helen, Anne e Lawrence.

Për herë të parë në jetë janë bashkuar edhe nipërit e saj, e për nder të gjyshes së tyre, ata kanë lëshuar nga nja tullumbace, transmeton Telegraph.co.uk.

Një nga vajzat e gjyshes Ward, Anne Hudson ka thënë se e ëma e saj kurrë nuk i ka harruar ditëlindjet e nipërve dhe stërnipërve.

“Nëna ka qenë e shkëlqyeshme në çdo aspekt. Ka qenë e dhënë pas familjes. Ajo ka qenë gjithmonë aty kur na është nevojitur. Kurdo që kemi qenë në telashe, e kemi ditur se mund të shkojmë tek ajo”, ka thënë Anne.

“Tërë vitin na ka blerë dhurata. Shkonte nëpër dyqane dhe kërkonte dhurata sepse gjithmonë ka dashur që çdokujt t’i blejë së paku nga një imtësinë”, ka shtuar Anne.

“Nganjëherë ka qenë edhe e rreptë në mënyrë që ta na mbajë të gjithëve nën kontroll dhe ka qenë shumë krenare me familjen e saj. Si ajo edhe babai vinë nga familje të mëdha. Nëna ka pasur nëntë vëllezër e motra, derisa baba ka pasur 14. Unë kam vetëm tre fëmijë, përderisa disa nga vëllezërit e motrat e mia kanë nga dhjetë e njëmbëdhjetë fëmijë”, ka përfunduar Anne.

Birra që shpëton jetë ka shije të tmerrshme
Është prodhuar një birrë e cila ndihmon në zgjatjen e jetës dhe parandalon nga sëmundjet, mirëpo e meta e saj është se ka shije shumë të keqe.

Studentët nga Teksasi kanë bërë modifikimin e birrës normale duke prodhuar të ashtuquajturën ‘Biobirra’, e cila përmban tharmin reservatrol.

I njëjti tharm përdoret edhe në prodhimin e verës për qëllime shëndetësore, për të parandaluar sëmundjet e zemrës, diabetin dhe sëmundjen Alzhemer.

Mirëpo, kundrejt të gjitha këtyre të mirave, Biobirra ka një shije të TMERRSHME.

“Nuk ka shans që dikush ta pijë këtë birrë nëse nuk përmirësohet shija e saj”, është shprehur Thomas Segall-Shapiro, njëri nga hulumtuesit.

Ia vlen të udhëtohet për ushqim
Një grup personash ushqimdashës kanë udhëtuar 354 kilometra për ta shijuar një byrek të veçantë me mish dhe patate.

Më shumë se njëqind admirues të ushqimit kanë udhëtuar nga Bristoli në Kingsbridge të Devonit për të provuar byrekun, njofton BBC.

Udhëtimi ka qenë i organizuar, ndërsa grupi ushqimdashës e ka shijuar ‘gjahun’ e tyre gjatë dy vakteve.

Ky lloj byreku është traditë njëqindvjeçare e familjes Lidstone të cilët janë shumë të njohur në këtë biznes.

“Ishte shumë i shijshëm, mishi dhe patatet ishin një shtesë e veçantë, ishte thjeshtë i përsosur”, ka thënë njëri nga ushqimngrënësit e kënaqur.

Nxjerrin 100 tonë mbeturina nga shtëpia e pensionistit
Shtëpinë e britanikut 73-vjeçar Merv Johns është dashur ta pastrojnë punëtorët e higjienës komunale të cilët kanë nxjerrë prej saj hiq më pak se 100 tonë mbeturina.

Pensionisti, gjatë viteve, të gjitha hapësirat e shtëpisë i ka mbushur nga dyshemeja në tavan i ka mbushur me gjëra të ndryshme të hedhura, kryesisht të nxjerra nga kontejnerët.

Në kodrat e mbeturinave, të mbledhura me dekada, pastruesit kanë gjetur edhe disa gjëra të pabesueshme, si gjashte skelete të qenve, disa pushkë të vjetra gjahu dhe municion. Aty ka pasur edhe lodra të panumërta, kryesisht lodra, aparate të prishura elektrike dhe shishe të zbrazëta.

Shumica e gjësendeve kanë qenë në gjendje shumë të keqe, të ndotura me jashtëqitje të pëllumbave. Dritaret kanë qenë të thyera, e gjithandej janë gjetur kurthe për minj.

"Kam dashur që ta pastroj të tërën. Kam tentuar ta rregulloj shtëpinë”, ka thënë Johns.

Higjiena komunale pas ankesave të fqinjëve ka dërguar një grup të punëtorëve për të pastruar shtëpinë e pensionistit, e tani kërkon që këtë punë gjigante ai ta paguaj.

Derisa ka zgjatur pastrimi trejavësh i shtëpisë së Johns, ai ka qenë i vendosur në një dhomë hoteli.

Del me krokodilin për pije
Pronari dhe mysafirët e lokalit "Johnny’s Saloon" në Mississippi janë shokuar kur në dyert e barit ka hyrë një njeri, i cili me vete po bartte një kafshë të pazakontë shtëpiake - krokodilin.

Edhe pse bëhej fjalë për një aligator relativisht të ri, të gjatë gjithsej një metër, pronari i barit nuk ka pasur shumë mirëkuptim dhe menjëherë ka thirrur policinë si dhe shërbimin veterinar.

Mysafirët e “Johnny’s Saloon” pas një grindje të ashpër kanë shtyrë mysafirin që kafshën e tij të dashur ta kthejë në automjet, e pak kohë më pas ka arritur edhe policia.

Mashkulli është arrestuar, e më pas në shtëpinë e tij është gjetur edhe një krokodil më i madh.

Duke marrë parasysh se në Mississippi është e ndaluar që të mbahen krokodilët si kafshë shtëpiake, mashkulli është paditur dhe do të përgjigjet për shkelje të ligjit dhe rrezikimit të njerëzve tjerë.

Plaçkitësi kërcënon me ankesë pasi nuk gjen para
Policia ka thënë se një mashkull nga Pennsylvania qendrore ka tentuar të plaçkit një bankë, por sirtarët e zbrazët në sportelin e bankës ia kanë prishur tentimin e tij.

Togeri i policisë në Springettsburys, Scott Laird, ka thënë se sportelistët ishin duke pritur që sirtarët e tyre të mbushen me para kur një mashkull hyri në filialin e bankës Susquehanna Bank të enjten në mëngjes dhe kërkoi para. Sportelisti i parë u alivanos derisa dy tjerët ia treguan sirtarët e zbrazët.

Laird ka thënë se plaçkitësi ka kërcënuar se do të bëj një ankesë tek udhëheqësia e bankës para se të largohej.

Një klient i cili po kalonte para bankës thirri policinë.

Një 48-vjeçar është arrestuar rreth 10 blloqe më larg dhe është ngarkuar për tentim kriminal për të kryer plaçkitje.

I burgosuri kanadez, tepër i trashë për qeli, lirohet më herët
Autoritetet kanadeze të burgut kanë qenë të shtyra të lirojnë nga burgu një anëtar 205 kilogramësh të një bande droge në fillim të javës së kaluar sepse ai ishte tepër i madh për qelinë e tij, shkruan gazeta Journal de Montreal.

Michel Lapointe, i njohur si Big Mike, ishte arrestuar në shtator të vitit 2006 dhe ishte dënuar me pesë vjet burg. Gazeta ka thënë se ai nuk mund të rrinte ulur në karrigen e tij në burgun e Montrealit dhe as e zinte krevati i burgut.

Një letër nga autoritetet drejtuar tek Laponte thotë: "Ju keni qenë i burgosur për më shumë se 25 muaj dhe kushtet tuaja të burgut janë të rënda për shkak të shëndetit tuaj".

Autoritetet po ashtu kanë cituar refuzimin e dy burgjeve tjera për të pranuar 37-vjeçarin. Ai është liruar të martën e kaluar.

"Më në fund do të kam një krevat të duhur dhe përfundimisht një karrige në të cilën do të mund të ulem”, ka thënë ai për gazetën prej jashtë burgut.

"Dua një jetë normale. Kam bërë gjëra të marra në jetë dhe kam paguar për to", ka thënë ai.

Qentë kënaqen në klubin e notimit
Dy qen delesh janë bërë anëtarë nderi të një klubi kinez të notimit.

Qeni katërvjeçar Paris dhe gjashtëmuajshi Carlo notojnë së paku 5 kilometra në ditë në lumin Jialing në Chongqing, raporton gazeta lokale Chongqing Morning Post.

Qentë tani janë bërë anëtarët më të popullarizuar të ekipit fitues të qytetit, madje kanë edhe vendin e tyre të veçantë për të bërë dush pas notimit.

"Nëse anëtarët tjerë të ekipit rastësisht gjuajnë ndonjë gjë në lum, Paris zhytet në ujë dhe i largon nga aty", ka thënë pronari Yu Guoqing.

Ai ka thënë se Parisi ka notuar që prej moshës së Carlos dhe që dy të qentë e duan notin e tyre ditor.

Çdo pasdite ata u bashkohen kolegëve të tyre njerëz, dhe pas sinjalit, kërcejnë në lum.

"Fillimisht e kam blerë Parisin si një shok për të notuar por kurrë nuk ma ka marr mendja se do të bëj kështu. çdo ditë ai noton së paku tri kilometra, e nganjëherë edhe deri në 25 kilometra”, ka thënë Yu.

Yu ka thënë se ai me gruan e tij janë notarë të flaktë dhe shënojnë distancën më të largët të qenit përditë. Ata vlerësojnë se ky qen ka notuar deri më tani mbi 10.000 kilometra.

7.500 dollarë lihen në këpucët e falura
Një dyqan bamirës amerikan ka kthyer 7.500 funte një mashkulli i cili gabimisht i ka falur paratë së bashku me një palë këpucë të vjetra.

Paratë janë zbuluar nga një emigrante bullgare në ditën e parë të saj në dyqanin Goodwill në Illinois, raporton Sky News.

Teodora Petrova i ka kthyer 7.500 menaxhmentit pasi që i ka gjetur në vlera të mëdha brenda një kutie të këpucëve.

Dyqani Glen Carbon më pas u përgatit për hapat e vështirë në gjetjen e donatorit të këpucëve.

Për fat të mirë, disa copa letra të lëna në kuti i ndihmuan sa duhet informata që Goodwill të gjej familjen.

Donatori me sa duket gjithashtu kishte thirrur zyrën e dyqanit bamirës, duke lënë të kuptojë se ai ishte burimi i parave.

Këpucët u takonin prindërve të vdekur kohë më parë. Dyqani Goodwill ka thënë se ai nuk ka dashur të identifikohet.

Familja i ka afruar zonjës Petrova një dhuratë për ndershmëri në kthimin e parave.

Sulmon të dashurën me sandviç dhe përfundon në polici
Lufta në mes të gjinive është e përjetshme, e duket se në skenimin e fundit inventari i armëve është pasuruar me as më pak e as më shumë, sesa, një sandviç. Në fakt, mashkulli nga Florida e ka parë të udhës që të dashurën e tij ta sulmojë gjatë kohës së vozitjes dhe me këtë të rrezikojë aksident në trafik.

Çka ka marrë për arsye i riu i inatosur i cili me sandviç e ka sulmuar të dashurën e tij, nuk dihet, mirëpo atë e ka goditur fillimisht në dorë, më pas në fytyrë, ku asaj i kanë rënë syzet dhe ka humbur kontrollin mbi vozitjen, shkruan gazeta britanike Metro.

Agresioni nuk është ndalur në produktet ushqimore. Nëntëmbëdhjetëvjeçari më pas e ka shkëputur retrovizorin e brendshëm dhe më të ka thyer xhamin e përparmë. I tërë muhabeti ka përfunduar në polici, ku dhunuesi është liruar pasi që ka paguar 5.700 dollarë kaucion.

Sipas versionit të sulmuesit, ai nuk ka dashur që ta sulmoj me dorë prandaj është shërbyer me sandviç. Se si ai do të arrij një ditë që djalit të shtatëmuajsh i cili gjatë zënkës së prindërve ka qenë fjetur në ulësen e prapme, këtë nuk do të marrim vesh kurrë.

Dërgohet në spital me varësi ndaj lojës Playstation
Mjekët italianë kanë diagnozuar një djalosh 13 vjecar me varësi ndaj lojës Playstation pasi që babai i tij i dëshpëruar e dërgoi atë me nguti në spital.

Fillimisht doktorët e spitalit të qytetit jugor italian Lecce menduan se Lorenzo Amato po vuante nga një goditje në tru apo një çrregullim i rëndë mendor.

Tinejxheri nuk mund të fliste dhe nuk dukej se po kuptonte ndonjë gjë prej atyre që po ndodhnin rreth tij. Më pas doktorët kuptuar se ai sapo kishte përfunduar një lojë maratonike me lodrën e tij Playstation.

Djaloshi më vonë ka urdhëruar babanë e tij të gjuaj në mbeturina lodrën e tij.

"Vetëm kur mendoj për të, më vjen të vjell", ka thënë djaloshi i cili është këndellur më pas.

Gjinjtë e gjithëfuqishëm
Keni gjinj? Atëherë nuk keni nevojë të mërziteni për krizat energjetike në të ardhmen. Gjatë disa viteve të ardhshme gjinjtë do të mund të bëheshin një prej burimeve alternative të energjisë, falë shkencëtarëve.

Gjatë pesë viteve të ardhshme profesori Zhong Lin Wang nga Instituti teknologjik në Georgia të Shteteve të Bashkuara të Amerikës planifikon të prodhojnë një tekstil të përbërë nga nano-telat i cili gjeneron energji elektrike me anë të vibrimit.

Ky tekstil në të ardhmen do të mund të gjenerojë 80 mili/vat rrymë në metër katror, që mjafton për mbushjen e celularit.

Wang u ka thënë gazetarëve se në mënyrë që tekstili relativisht i lirë të cilën e prodhon do të ishte ideale për përpunim e jelekëve për shkak të vibrimeve dhe lëvizjeve të cilat i shkaktojnë gjinjtë.

Tani, po na bien ndërmend edhe shumë rroba të cilat i veshim ku ekziston vibrim më i madh me trupin, mirëpo në çdo shkencëtar fshihet nga një pervers, e kush jemi ne në fund të fundit që t’ua prishim ëndrrat?

Kapet me penis në kavanoz
Penisi, kavanozi dhe përndjekja policore janë vetëm disa nga elementet e këtij tregimi bizar, i cili ka ngjarë në një plazh të Australisë.

Një mashkull është arrestuar pasi që policia e ka kapur në automjet me penisin e tij në kavanoz.

Perversi 46-vjeçar Keith Roy Weatherley, po qëndronte ulur në automjetin e tij në afërsi të plazhit Nobbys në Australi, kur i është ofruar policia.

Djelmoshave në uniformë u është dukur se ai ishte i armatosur, prandaj kishin nxjerrës armët e tyre.

Kur i kishte vërejtur, Weatherley i kishte dhënë gaz, që solli deri tek një përndjekje e shkurtër. Policia e kishte kapur për 10 minuta.

E kur në fund u ndal, ai nuk deshi të dalë nga automjeti, prandaj policët ishin të shtyrë të përdornin dhunën. Pasi që e nxorën prej veture, atyre u ra në sy kavanozi prej 750 ml, që po qëndronte i varur në penisin e tij.

Policia ka gjetur në automjetin e tij në varg gjësendesh, në mesin e të cilave edhe revista pornografike, lodra seksi të punuara nga ai, çorape femrash dhe një qen.

Weatherley është shpallur fajtor për sjellje të pamoralshme dhe rezistencë gjatë arrestimit.

Në mbrojtjen e tij, ai ka thënë se po ikte nga policia sepse po tentonte të “dukej normal”. Ai është dënuar me 400 euro.

Australia bëhet me partinë Seks
Partia e re australiane ka zgjedhur vendin e duhur për reklamimin e vet, shtëpinë e mallrave me lodra seksi, derisa shitësit kanë premtuar se për secilin do të ketë nga diçka.

"Mendimi i kësaj bashkësia ndaj seksit dhe censurës është i njohur moti. Nga anketat shihet se njerëzit janë më të relaksuar se kurdoherë, derisa në politikë gjendja është krejtësisht e kundërt”, ka thënë e para e partisë Seks Fiona Patten.

"Kur keni dëgjuar për herë të fundit që ndonjë politikan të jetë shprehur bukur për seksin", ka thënë ajo.

Ish disenjatorja e modës ka thënë se platforma e partisë do të ketë për bazë luftën kundër censurës dhe lobimin në të mirë të martesave homoseksuale dhe të drejtën e homoseksualëve për të adoptuar fëmijë.

"Nuk besoj se do t’u pëlqejmë të gjithëve", ka thënë Fiona Patten, ish udhëheqëse e grupit lobist të industrisë seksuale Eros Foundation.

Viagra pa pagesë për të moshuarit mbi 70 vjet
Mbi 100.000 meksikanë të cilat kanë mbi 70 vjet do të mund të marrin Viagra pa pagesë në kuadër të programit “shëndeti seksual” të cilin Ciudad de Mexico e nis në muajin dhjetor.

“Rreth 112.000 persona të moshuar do të mund të marrin pa pagesë tabletat kundër impotencës, por nuk do t’i përshkruajmë ato pa bërë kontrollet e rrepta paraprakisht, sepse ekzistojnë kundër-indikacione të rrezikshme”, ka thënë ministri i shëndetësisë i qarkut të kryeqytetit Armando Ahued.

Programi i “shëndetit seksual” i cili do të fillojë më 1 dhjetor në tri spitale shtetërore të kryeqytetit, bazohet në parimin se aktivizimi seksual mund të zgjasë sa edhe vet jeta. Tableta në tregun lokal sillet në mes 130 e 150 pezo meksikane, respektivisht rreth 8 euro.

“Është qëndrim i përgjithshëm se seksualiteti merr fund me gjashtëdhjetë vjet, por disa mund të kanë jetë aktive seksuale edhe pas të shtatëdhjetave. Jeta seksuale është pjesë e jetës dhe dëshirës që të jemi të lumtur”, ka thënë ministri.

Celulari ia shpëton jetën nga plumbi qorr
R.J. Richard thotë se normalisht asnjëherë nuk e vendos celularin e tij në xhepin e përparmë të këmishës. Por ai ka thënë se kjo gjë i ka shpëtuar jetën herën e parë që e ka praktikuar.

Burri 68-vjeçar nga Covington, Louisiana, ishte duke kositur livadhin e tij prej 40 arësh kur një plumb qorr nga pylli i afërm e goditi celularin e tij. Ai mendoi se ishte një gur i goditur nga traktori. Por, ai mendoi kështu vetëm deri atëherë kur e nxori celularin e tij dhe një plumb i kalibrit 45 ra nga shtëpiza e tij.

Richard ka thënë për gazetën The Times-Picayune nga New Orleans se nuk mendon se ishte aspak e rastësishme.

"E shoh këtë punë si një mesazh nga Zoti që të vendos celularin tim në këtë xhep, dhe jam falënderues për këtë", ka thënë ai.

Doktorët i kanë thënë Richardit se plumbi erdhi nga një kënd që së bashku me celularin me gjatë parandaluan plagosje serioze.

Rasti është duke hulumtuar, derisa nuk besohet se qitja në drejtim të tij nuk ishte i qëllimshme.

Karioke-taksi
Taksisti kinez me ambicie këngëtari ka vendosur që në automjetin e tij të vendosë aparatin për karioke në mënyrë që gjatë pauzës të mund të këndojë, e më këtë ide të janë kënaqur edhe myshterinjtë.

Fan Xiaoming ka shpenzuar rreth 700 euro në tre ekrane të rrafshëta (flat), 16 zmadhues dhe ndriçim si të diskotekave.


''Shumë njerëz e kërkojnë numrin tim në mënyrë që t’i vozis prapë, e nganjëherë më lusin t’i vozis rrugës së gjatë në mënyrë që edhe ata të mund të këndojnë më gjatë''.


Këndimi i pasagjerëve nuk i pengon në vozitje. Thotë që i di të gjitha këngët dhe kjo i vjen si të dëgjoj ndonjë radio stacion.


''Këndoj vetëm gjatë kohës së pauzës me miqtë e mi taksistë”, thotë Fan.
Fan punon si taksist për nëntë vjet dhe gjithmonë ka dashur të bëhet këngëtarë, mirëpo asnjëherë nuk ka pasur kohë të ushtrojë këndimin sepse gjatë tërë kohës është në timon.


''Kështu një ditë më ra ndërmend se do të mund të integroja aparatin për karioke në automjet”, ka thënë ai.

Arrestohet e dyshuara “Plaçkitësja Gjyshe”
Policia në Ohio të Shteteve të Bashkuara të Amerikës kanë arrestuar gruan 68-vjeçare nën akuzën për plaçkitje të bankës, dhe ata duan të dinë nëse ajo është e ashtuquajtura “Plaçkitësja Gjyshe” që ishin duke e kërkuar nga muaji maj i vitit të kaluar.

Policia në jugperëndim të qytetit jugperëndimor Franklin të Ohios thotë se një grua i dha një letër sportelistit në filialin e bankës Huntington të premten dhe u largua me një shumë të konsideruar të parave.

Policët thanë se Barbara Joly nga Middletown është arrestuar pak kohë më vonë gjatë asaj dite pasi që u përshtat me përshkrimin e gruas e cila plaçkiti bankën.

Hulumtuesit policorë thonë se Joly kishte syze dielli dhe një shall me vete.

Ata nuk dëshirojnë të thonë nëse këto gjësende ishin të bartura nga plaçkitësja gjatë plaçkitjes së premtes, por është pikërisht kjo veshje që ishte bartur nga një grua gjatë katër plaçkitjeve në këtë rajon që prej muajit maj të këtij viti.

Jeleku për meshkuj është hit në Japoni
Një shpërndarës online japonez i të brendshmeve seksi ka lansuar linjën e parë të jelekëve për meshkuj të cilët janë bërë hit absolut në treg.

Edhe pse janë në treg vetëm dy javë, jelekwt e meshkujve janë shitur në mbi 300 copë, transmeton Reuters, dhe atë me çmim prej 30 dollarëve amerikanë për copë.

Shpërndarësi dhe prodhuesi i jelekëve, Wishroom, po ashtu prodhon edhe brekë seksi për meshkuj si dhe për femra.

Jeleku për meshkuj është më diskret nga ai i femrave prandaj mund të bartet pa u vërejtur nën rroba, derisa ai mund të blihet në ngjyrë të zezë dhe rozë.

"Shumë meshkuj janë interesuar për këta jelekë. Kjo është dëshmi se sa shumë ka prej tyre që kanë dëshirë të bartin rroba të femrave, dhe se sa prej tyre e kanë te theksuar anën femërore", zbulon Akiko Okunomiya, drejtoreshë e Wishroom.

Aktorja e filmave pornografik punon në shkollë fillore
Louisa C. Tuck, punëtore në kuzhinën e një shkolle fillore në qytetin Vineland të shtetit të New Jerseyt, është bërë ankth i vërtetë i drejtorisë pasi që është marr vesh se ajo më herët ka pasur karrierë të suksesshme në industrinë e zbavitjes për të rritur.

Prindërit dhe Këshilli i shkollës dëshirojnë ta largojnë nga puna, por autoritetet lokale të cilat janë konsultuar me avokatët thonë se nuk ka kurrfarë baze ligjore për këtë.

Tuck, e cila me biznesin pornografik është marrë nën emrin Crystal Gunns, u ka thënë mediave se kanë kaluar pesë vite qëkur ka ndërprerë të merret me atë punë.

“Nëse bëhet fjalë për moralin, presidenti ynë i ri i porsazgjedhur ka pranuar që në rini ka provuar kokainën. A e bën kjo njeri të keq?”, ka pyetur Tuck.

“Bill Clinton ka tymosur bari. A e bën kjo njeri të keq?”, ka vazhduar ajo.

Terminali i aeroportit i bëhet shtëpi
Një turisti japonez i ka pëlqyer aq shumë aeroporti në Mexico City kur arriti për herë të parë në të sa që ende po qëndron pikërisht aty, edhe pas tre muajsh.

Hiroshi Nohara ka vendosur ta bëj Terminalin 1 të Aeroportit Ndërkombëtar “Benito Juarez” shtëpinë e tij të re, raporton gazeta Daily Mail.

Ai ka mbijetuar nga donacionet e restoranteve të ushqimit të shpejt dhe udhëtarëve prandaj po bën një jetë të ngjashme me karakterin e Tom Hanksin në filmin e njohur “The Terminal”.

Ai është bërë një lloj personaliteti i famshëm, pasi që televizionet pothuajse përditë raportojnë për të. Turistët ndalojnë të dalin në fotografi me të apo të marrin ndonjë autograf.

Zotëriu Nohara, nga kryeqyteti japonez Tokyo, ka udhëtuar në Meksikë me një vizë turistike, por kurrë nuk është larguar prej aeroportit. Ai ka thënë se nuk kishte qëllim për të qëndruar më gjatë por edhe se nuk e di sa gjatë do të qëndrojë.

"Se kuptoj pse jam këtu", i ka thënë një stacioni televiziv. “Nuk kam ndonjë arsye. Jeta ime është Terminal 2".

"Ai është një njeri i qetë, një njeri i mirë", ka thënë Silvia Navarrete del Toro, një pastruese e aeroportit. "Ai rri ulur dhe ha tërë ditën".

Autoritetet kanë thënë se nuk mund të bëjnë gjë që ta shtyjnë Noharan të largohet derisa viza e tij turistike të skadojë në muajin mars të vitit të ardhshëm.

Macja një javë nën kapakun e motorit të automjetit
Një vozitës austriak nuk mund ta gjente pse Mercedesi i tij po “mjaullinte” më shumë se zakonisht, derisa nuk shikoi nën kapakun e motorit.

Peter Hochberger zbuloi se macja e tmerruar e fqinjit të tij me emrin Luna ishte ngujuar në bllokun e motorit, për pothuajse një javë.

Luna fatbardhë kishte mbijetuar mbi 500 kilometra vozitje pa ushqim e ujë para se mjaullimat e saj të alarmonin.

Macja e tmerruar ishte fshehur aq thellë brenda motorit sa që u desh të çmontohet për të nxjerrë prej aty.

Mekaniku 48-vjeçar Walter Doerfler, ka thënë: "Se kam idenë se si ka arritur të futet aq thellë në makinë, u desh një punë bukur e madhe për të larguar pjesët që të arrijmë deri tek ajo".

Çuditërisht ajo shpëtoi vetëm me disa lëndime të vogla dhe tani është kthyer tek familja e saj në qytetin Ruprechtshofen të Austrisë, ku po i numëron edhe tetë jetët e saj të mbetura.

Çifti padit McDonald's-in për fotografitë lakuriqe
Një çift amerikan janë duke paditur korporatën McDonald's për 2 milionë dollarë pasi që fotografitë lakuriqe të gruas, të cilat ishin në celularin e burrit të saj, përfunduan në internet.

Phillip Sherman thotë se rastësisht e ka lënë telefonin e tij, së bashku me fotografitë, në një McDonald's në qytetin Fayetteville të Arkansasit, raporton BBC.

Ai ka thënë se personeli i kishte thënë se do ta sigurojnë telefonin derisa ai do të kthehej për ta marrë.

Por çifti Sherman pohon se është dashur të zhvendosen nga shtëpia e tyre pasi që emri, adresa dhe numri i telefonit të gruas së tij u paraqiten online së bashku me fotografitë.

Tina Sherman thotë se ajo filloi të pranojë telefonata ofenduese dhe mesazhe tekstuale për fotografitë nga celulari i burrit të saj pasi që e kishte harruar në McDonald's më 5 korrik të këtij viti.

Çifti më pas zbuloi se fotografitë lakuriqe të cilat ajo ia kishte dërguar burrit në celularin e tij ishin publikuar online.

McDonald's deri më tani ka refuzuar të komentojë rastin.

Zemra e djaloshit rritet jashtë trupit të tij
Doktorët në Kinë janë duke tentuar që të shërojnë një djalosh katërvjeçar, zemra e të cilit po rritet jashtë stomakut të tij.

Zemra e Zhang Weiyuan është e mbuluar vetëm me një shtresë të hollë të lëkurës dhe mund të shihet lehtazi sesi rrah, raporton agjencia e lajmeve Northeastern News Network.

Zhang, nga fshati Hetai i provincës Panjing, është dërguar në spitalin e Shengjing, respektivisht në Universitetin Mjekësor të Kinës, ku doktorët janë duke analizuar opsionet e tyre.

"Nuk jemi të sigurt nëse mund të kryejmë një operacion për të kthyer zemrën e tij në vend të vet, por do të bëjmë më të mirën”, ka thënë një zëdhënës i spitalit.

Prindërit e tij e mbështjellin me rroba më të trasha për të mbrojtur zemrën e tij dhe e ndalojnë atë të luaj me fëmijët tjerë për ta ruajtur nga aksidentet e mundshme.

Babai i tij, Zhang Xianzhen, një mbledhës mbeturinash, ka thënë se ndihet fajtor që nuk e ka dërguar djalin e tij për ta vizituar tek doktorët më herët.

"Si unë dhe gruaja ime mbledhim mbeturina, dhe nuk fitojmë shumë para. Prandaj nuk e kemi dërguar birin tonë për vizitë tek doktorët sepse nuk mund t’i përballojmë shpenzimet.

"Ai nuk qan kurrë edhe pse ka dhimbje tërë kohën, që na bën ne të ndihemi edhe më shumë fajtorë", ka thënë Zhang.

Peshkaqeni ‘sulmon’ tinejxherin në dhomën e fjetjes

Një tinejxher nga Dudley i Anglisë ka mbijetuar pasi është kafshuar në fytyrë nga një peshkaqen, në dhomën e tij të fjetjes.

14-vjeçari, Sam Hawthorne, është ‘sulmuar’ kur “jerm” ka shkuar drejt suvenirit peshkaqen, i cili ishte i varur në mur, raporton Metro.

Atij i është ngulitur krijesa në faqe dhe i ka rrjedhur gjak nga një plagë e marrë.

E ëma e tij, Susan Hawthorne është zgjuar nga britmat e djalit të saj por arriti tepër vonë për të parandaluar atë nga ngulitja në suvenir.

"Ka qenë diçka si në filma horror. Peshkaqeni sigurisht ka qenë i ngulitur në fytyrën e Samit për rreth 15 minutash derisa ai kishte dhimbje të mëdha"

Sam, i cili ka shpëtuar vetëm me një gërvishtje të vogël, ka thënë: "Ka qenë përvoja më
frikësuese në jetën time".