Meta niset për një vizitë zyrtare në Slloveni

Zv/kryeministri dhe ministri i Punëve të Jashtme të Shqipërisë, Ilir Meta u nis të enjten për një vizitë zyrtare në Slloveni, me ftesë të ministrit të Punëve të Jashtme të Sllovenisë, Samuel Žbogar.
Përveç bisedimeve zyrtare në Ministrinë e Punëve të Jashtme të Sllovenisë, Meta do të pritet në takime të veçanta edhe nga presidenti i Sllovenisë, Danilo Turk dhe nga kryetari i Asamblesë Kombëtare, Pavel Gantar.
Gjatë qëndrimit të tij në Ljubljanë, Meta pritet të takohet edhe me përfaqësues të komunitetit shqiptar që punojnë e jetojnë në Slloveni.
Në qendër të vizitës do të jenë çështje të marrëdhënieve dypalëshe, të bashkëpunimit në kuadër të NATO dhe BE, si dhe të bashkëpunimit rajonal dhe zhvillimeve në rajon.