Pittella: Politika të gjejë rrugën e zgjidhjes

Zëvendëspresidenti i Parlamentit Evropian, Giovanni Pittella vlerëson hyrjen e opozitës në parlament dhe shpreson për një zgjidhje që mund të garantojë transparencën e zgjedhjeve në të ardhmen.

Në një konferencë të përbashkët për shtyp, në selinë e Partisë Socialiste me kreun Edi Rama, Pittella theksoi se një klasë politike inteligjente që sheh drejt Europës, duhet të gjeje një pike ekuilibri mes nevojës për transparencë dhe rrugës për të zgjidhur krizën.

Pittella po ashtu vuri në dukje se stuhia e krizës ekonomike nuk ka përfunduar ende dhe ajo nuk kursen as Shqipërinë.

"Kriza që goditi botën nuk është ezauruar ende, ndaj duhet të përballemi me krizën ekonomike, financiare dhe sociale", u shpreh Pittella.

Zyrtari i lartë theksoi edhe se procesi i integrimit të vendit dhe ai i liberalizimit të vizave ka nevojë për zbutjen e klimës së krizës politike në Shqipëri.

Nga ana e tij, kreu socialist Edi Rama theksoi se e ka informuar Pittella-n për gjendjen e rëndë ekonomike ku ndodhen shqiptarët, si dhe për krizën politike që po ndikon jashtëzakonisht në mbarëvajtjen jo vetëm të ecurisë së vendit, por edhe të procesit të integrimit të Shqipërisë në Bashkimin Europian.