Rama: Berisha, po fundos ekonominë

Kryetari i Partisë Socialiste Edi Rama ishte në Vlorë, në krye të një mitingu proteste. Lejtmotiv i fjalës së tij, ishte gjendja ekonomike.

Pa lënë mënjanë cështjen e kutive, Partia Socialiste, synon kësaj here të prekë qytetarët te xhepat e tyre, duke vënë në pah, rritjen e cmimeve të disa produkteve dhe shërbimeve, sic konfirmohen së fundi nga INSTAT.

“Të gjithë e kanë marr vesh se Sali Berisha i vodhi zgjedhjet. Pushteti i Sali Berishës nuk fundosi vetëm zgjedhjet, ai po fundos ekonominë shqiptare, duke bërë të humbasi mijera vend pune cdo muaj e rritur përditë faturat e ushqimeve, ilaceve, energjisë e ujit. Protesta jonë për hapjen e kutive të krimit elektoral është barrikada jonë kundër rrënimit ekonomik”, u shpreh Rama.

Socialistët besojnë se duke thënë shqiptarëve se nuk jetojnë në një mrekulli ekonomike, do të mobilizojnë një maksimum protestuesish për mitingun e tyre të 30 prillit:

“Berisha jo vetëm grabiti zgjedhjet, ai po rrënon edhe ekonominë e cdo zgjedhësi,Sali Berisha thotë se ju po jetoni në një mrekulli ekonomike,ju do të vini më 30 prill në Tiranë për t’i dhënë fund talljes së këtij pushteti të koruptuar me varfërinë, papunësinë, pafuqinë tuaj për të blerë bukën e përditshme të familjes”, u shpreh Rama.

Kohët e fundit figura të Partisë Socialiste kanë theksuar se cdo shqiptar ka sot një arsye për të protestuar.