Berisha: Rama ti adresohet Prokurorisë

Duke iu referuar nismave ligjore të paraqitura në Kuvend nga opozita, kreu i qeverisë shqiptare Sali Berisha ka ritheksuar edhe njëherë se kërkesat e opozitës për hetimin e zgjedhjeve janë çështje që i përkasin gjykatave dhe jo mazhorancës, duke nënkuptuar se hapja e kutive mbetet një kërkesë e panegociueshme.
Kryeministri Berisha deklaroi se kryesocialisti Edi Rama duhet ti ishte drejtuar Prokurorisë për të gjitha provat që ka për manipulime të zgjedhjeve. “Kam një propozim për zotin Rama: Ti drejtohet Prokurorisë për të gjitha pretendimet që ka. Prokuroria mund të hetonte edhe jashtë afateve. Nuk pati marrëveshje dhe kjo jo për fajin tim. Hapja e kutive nuk mund të bëhet pa procedurë kushtetuese”, theksoi Berisha.
Ndërsa nënvizoi se nismat ligjore të Partisë Socialiste do të trajtohen me seriozitet nga ana e qeverisë, kryeministri konsideroi të pabaza akuzat e socialistëve për shpërfilljen e ngërçit politik nga ana e qeverisë janë të pabaza.
Kryeministri Berisha tha se gjatë bisedimeve në tryezën e Presidentit Topi ai kishte rënë dakord për sugjerimet, duke theksuar se mazhoranca pranoi që çështja të dërgohet në Komisionin e Venecias por, siç tha ai, me miratimin e Gjykatës Kushtetuese.
“Pavarësia e gjyqësorit nuk cenohet”, tha kreu i qeverisë, duke shprehur urimin që opozita të jetë e pranishme në Parlament.