GJND: Pavarësia e Kosovës është krejtsisht legale

Gjykata Ndërkombëtare e Hagës (GJND) po vazhdon të arsyetojë mendimin e saj, sipas të cilit Deklarata e Pavarësisë së Kosovës nga Serbia nuk bie ndesh me të drejtën ndërkombëtare.

Mendimi këshillëdhënës i GJND-së i jep një shtytje njohjeve ndërkombëtare të pavarësisë së Kosovës, ka raportuar agjencia e lajmeve AP nga Haga.

Duke lexuar opinionin, presidenti i GJND-së, Hisashi Owada, tha se e drejta ndërkombëtare “nuk ndalon deklaratat e pavarësisë”.

Owada tha se shpallja e njëanshme e pavarësisë së Kosovës nuk ka shkelur asnjë dokument të Kombeve të Bashkuara.

Në këtë aspekt, ai ka përmendur ecurinë e tërësishme të zhvillimeve politike në Kosovë, që kanë të bëjnë me vendosjen e misionit të OKB-së në Kosovë, vendosjen e KFOR-it e të tjera.

Sipas tij, shpallja e pavarësisë është proces politik dhe jo ligjor.

Sipas Balkan Insight votimi i panelit gjyqësor është 9 me 4, një ka abstenuar, nga 14 gjyqtarë pjesëmarrës në votim.