U gjet dje në plehra, Rubena Moisiu: Ishte foshnje rreth 6 muaj, jo fetus

TIRANË- Detaje të reja dalin në dritë pas hetimeve të nisura dje për fetusin e gjetur në plehra, në afërsi të Spitalit Ushtarak të Tiranës.

News24 ka siguaruar fotot ekskluzive të foshnjes së hedhur në plehra, ndërsa drejtoresha e maternitetit ‘Koço Gliozheni’, Rubena Moisiu deklaron se nuk bëhet fjalë për një fetus të abortuar në muajin e tretë të shtatzanisë por për një foshnje të formuar tashmë. Këtë ajo e konfirmon pasi pa nga afër fotot e siguruara nga News 24.

Sipas saj, foshnja e gjetur dje ishte rreth 6 muajshe.

“Foshnja që u gjet dje është mbi 23 javëshe, pra dyfishi i periudhës ligjore për abortim”, sic tha Moisiu.

Nisur nga kjo, mund të themi se bëhet fjalë për një foshnje të abortuar në mënyrë të jashtëligjshme, por nuk përjashtohet edhe mundësia që nëna ta ketë lindur foshnjën para kohe. Trupi i foshnjes po i nënshtrohet ekspertizës, për të mësuar nëse ka qënë apo jo gjallë në momentin e abortit.

Ndërkohë hetimet për ngjarjen vijojnë, policia po heton për të gjetur se kush janë personat që e kanë hedhur foshnjen në plehra.

Foshnja rreth 6-muajshe u pa dje në afërsi të spitalit Ushtarak nga disa kalimtarë të rastit.
(ma.ar/BalkanWeb)