Berisha: Rama sms gazetarëve për operacionin tim, vetë dështoi me flokët

TIRANE – Kryeministri Sali Berisha akuzoi sot kryetarin e Partisë Socialiste Edi Rama se ka
dërguar mesazhe në celularët e gazetarëve në lidhje me operacionin kirurgjikal që shefi i qeverisë ka bërë në gjurin e djathtë fundjavën që kaloi.
“Është e vërtetë se të premten në ora 20:15 kam bërë një ndërhyrje kirurgjikale, për një problem në këmbën e djathtë, cili më ka shkaktuar problem në ecje, ju e dini se ecja është pasioni im”, tha Berisha në mbledhjen e grupit të deputetëve të Partisë Demokratike.
Berisha shtoi më tej se “u ktheva në shtëpi pa asnjë ndërklikim dhe i kam përmbushur të gjitha detyrimet e mia, operacione të tilla për njerëzit janë”.
Kryeministri akuzoi më pas kryetarin e opozitës për disa operacione jonormale kur tha se “dy fjalë dua ti them zotërisë, mos dërgo më mesazhe në telefonat e gazetarëve, sepse operacionet janë për njerëzit, por ka disa operacione që kanë domethënie tjetër, janë ato që detyrohesh ti bësh 30 apo 40 vjet para kohë, ato operacione si përshembull kur shkon të bësh flokët, rri dy javë në klinikë dhe nuk të mbin një qime, jo për faj të farës, por për faj të arës, kjo ka domethënien e saj”, tha Berisha.
Ai atakoi përsëri kreun e opozitës Edi Rama duke thënë se ka operacione ku shkon të heqësh xhufkat në qepalla dhe të nxihen më keq apo kur shkon të bësh dhëmbët dhe të bien.